الحرية بين صنعاء وعدن !!!

كثير من النشطاء فرحانين بفتح مطار صنعاء نكاية بعدن مش أنه فرحان على عشان أخواننا في صنعاء وأهلنا هناك بيقدروا يسافروا بأريحية بدال مشقة السفر إلى عدن أو سيئون عشان يسافروا من مطاراتنا ... 

البعض للأسف يصدر أن عدن أو أن صح التعبير المناطق التي تقع تحت سيطرة المجلس الانتقالي الجنوبي هي مناطق أصبحت دون أمن وأمان وحرية الرأي فيها معدومة وأن عدن غائبة !!! 

شوفوا يا جماعة المزايدة مش مليح .... 

انا من أكثر الي أنتقدوا المجلس الانتقالي الجنوبي على بعض الأخطاء وأنا بيني وبينهم مسافات معدودة لكن شهادة لله ما أحد منهم بيوم من الأيام حاول يتعرض لي أو يمسنا بسوء وغيري كثير على فكرة وأن كنت مجرد ناشط على فيس بوك لا أقل ولا أكثر ولست قيادي معارض للانتقالي !!! 

حتى على سبيل التفتيش وطلب البطاقة كم من مرة جزعت إلى جولدمور ومحد طلب بطاقتي بالعكس ابتسامة بشوشة وتفضل حياك وبعض احيان يطلبوا البطاقة واعطيهم وأشوفه عادي جدا ... 

الكلام الي أنت قادر تقوله في حكام عدن ماتقدرش تقوله على حكام صنعاء وأنت هناك !!! 

منشوراتك على الفيس الي تهاجم فيها الأمن بعدن طول الوقت بأريحية ماتقدرش تكتب ربعه على الأمن بصنعاء لانك بتعتقل ببساطة !!! 

اذا كان عندك تحسس من طلب البطاقة في عدن على فكرة أجت فترة يطلبوا جوالك يفتشوه على نقاط مداخل صنعاء وأن كان هنا الي يطلبها عسكري لابس الميري هناك مجرد حوثي صغير لابس الزنة !!! 

في مشاكل داخل عدن ايوة كثير وفي أخطاء للمجلس ايوة في لكن لاتحاولوش تحولوا عدن غائبة وأنها خرابة روحوا فنادق ساحل أبين وشوفوا أخواننا من كافة المناطق الشمالية مرتاحين وبنعمة وفي يوتوبر كثير من أخواننا بالشمال نزلوا فلوجات عن الوضع في عدن ونفوا كل الشائعات !!! 

قبل أيام قليلة أقتحمت مليشيات مول كامل بصنعاء ودمرته ونهبته والفيديوهات موجودة بالفيس لكن محد كان قادر ينتقد عشان مايعتقل !!! 

لكن في عدن تحصل مشكلة صغيره تحصلنا كلنا نكتب عليها وننتقد وننظر ومستعدين نقطع شوارع ونحرق تواير وأن اجى الأمن تعامل معنا بحكمة طالما ما وجه سلاح ضده .... 

عمرك شفت مظاهرة واحدة فقط تطالب بالخدمات داخل صنعاء ؟! مش لانهم مرتاحين لا لان السلطة هناك تقمع أي مظاهرات وتعتقل الرجال والنساء ولا تفرق بين أحد !!! 

نصيحة أخيرة /// 

طالب بتصحيح الوضع في عدن وأبحث عن كل الحلول الممكنة لكن لاتتمناش أن الوضع في عدن ينتهي ويستبدل بغيره لان الي عاش بعدن بعد تحريرها وحجم الاغتيالات وسيطرة الجماعات المتطرفة فيها لا يمكن يتمنى أن الوضع الي نعيشه ينهار !!! 

* الصورة للرائع احمد شهاب 

تحياتي /// 

نوار ابكر