اللي مثل (مكي) أنقرضوا !!

صباح يوم الأحد زرت مدينة (التواهي) العريقة للمشاركة في تغطية بطولة السباحة ، وبعد الختام خرجنا للشارع من أجل البحث عن (باص أو سيارة) نعود بها إلى مدينة (كريتر) أنا والزملاء علاء عياش وحسين العبسي .
أول ماخرجنا قابلنا باص .. وبسرعة قلنا له : (إنجيز  إلى عدن) قال اطلعوا .. قلنا له بكم .. فادخل يده في (كيس) وأخرج (3 حبات شكليت) وقال اولا اتفضلوا .. الحركة ذي خلتنا اطلع على طول الباص دون نقاش .. وأول ماطلعنا الباص انا والزملاء .. قال تفضلوا (ماء) فضحكنا أنا والزملاء .. وبالفعل كنا محتاجين (دبة ماء) من العطش .
فقلنا له لا ذا كرم كبير منك .. قال نحاول نسكب الناس في ظل هذه الأوضاع الصعبة وعدم توفر البترول والغاز .. الناس أصبحت تتهرب منا بسبب الغلاء وارتفاع اسعار المواصلات .. فأصبح الوضع علينا صعب ، ولهذا ارجع اشل لي (نعنع وشكاليت) وماء .. واللى يطلع معي أحاول أكرمه على قد ما اقدر حتى يشعر بالراحة .. وكما أعطي للركاب ( عدد من الأسئلة والالغاز) من شان نجزع الطريق .. وكمان اعطي لهم بعض الشعر السهل والبسيط .
قلنا له طيب على كذا أنت خسران .. قال لا .. الحمد لله مافي حد طلع معي ونزل زعلان أو متضايق .. ولهذا أنا كسبان .
وعندما وصلنا إلى كريتر .. قلنا له طيب الآن كم باتشل حق (الإنجيز) .. فقال احسبوا الكراسي .. باشل عليكم كأنكم ركاب من (التواهي إلى كريتر) حسبنا وطلع الحساب ( 2800) .. اعطينا له (3 الف) ورجع لنا (مئتين ريال) جلسنا نضحك .. ونقول له اللى مثلك في هذا الزمان أنقرضوا ههههههه.
طبعا سائق الباص اسمه (خالد مكي) وهو رجل كريم وشهم وصاحب واجب .