صلاح الوافي والفرش

زمان قبل ما اتزوج تحديدا في الـ 2007 ، كنت حراف ، مافيش فلوس ، واشتي أئثث البيت حقي ، قدنا قريب على الزواج ، وكل ما حصلت مبلغ اشتري حاجة .. حالي مثل حال كثير من الشباب المكافحين.

رتبت تقريبا كل شيئ ، وبقي السرير ، قد كنت حصلت دولاب لوحده مستقل وسبطته ، قال لي صديق الفرش بتلاقي بالحراج حاجة زي الفل ( سليب هاي ) ولو تابعت كل يوم ممكن تتوفق بحاجة شبه جديد.

داومت ع الحراج ، قلبي يلهب ، اشتي حاجة جديد ، خصوصا السرير ، عريس وحراف ، والحراج حق الحصبة والجراف يورد كل يوم شكل ولون ، وعليها لما توفقت ولقيت فرش شبه جديد لنج ، ومش مبين ان عليه اي استخدام ، بس مشكلته حاجة واحدة ( الفرش كبير جدا ) سع اثنين سرير عادي وانا ما عاد ركزتش مو شطلع السرير للدور الثالث .

المهم ، اشتريت الفرش سريع ، وانا مروح اشتي الحق عندي ضيوف ، البحري ، عارف ، الفنان صلاح الوافي ، وقد هم جمب بيتي بالدائري قدام الجامعة القديم ، والفرش حقي يبان من عند الجامعة الجديد من كبر حجمه كبيرررررررر 

وصلت عند البيت ، علاقتي بصلاح كبيرة جدا ، صلاح شاف الفرش وقد هو يخافس نفسه ١٠٠ كلمة وانا اقول الله يخارجنا، تحملنا نطلع الفرش انا والعيال ، صلاح قال عيب والله ( شساعدكن) .

طرح قاته والبيبس والماء ، وهات يا بي هات على الدرج مع الشباب ، ولأن الفرش شبه جديد وال ( سبرينج) حقه زي الفل ، العيال دقوا بالفرش عرض السلم وصلاح ماسك بالطرف حق الفرش من ركن الجدار سمعته يصيح اوووووه ياماه ( اهتجش هجشة بطيبة نفس) وانا محرج مووووووت وقع له هجشة بطيبة نفس .

المهم بعد طلوع الروح ، طلعنا الفراش للدور الثالث ، بدأنا التخزينة ، كملنا للمغرب ، الساعة تسع ، تعشينا ورجعنا الشوط الثاني ، السمرة وخزانة عالمي ، نسيت وجع الفرش والتعب حق هذيك اليوم والجو عالمي .

تقريبا الساعة واحدة الليل صلاح سألني بشير كيف يا اخي ما تفكرش تعمر بيت مع المستقبل تأمن نفسك وجهالك اللي شجو ؟ ما خلانيش افكر وهو يشرح لي اهمية البيت .

قلت له طبعا اكيد ( تعرفوا خدارة القات تخلي الواحد يحلم) واصلت كلامي وان شاء الله اشوف لي من هنا او من هنا مبلغ واشتري ارض وربي يوفقنا واعمر …

قطع كلامي صلاح وقال : حلو حلو حلو ، بس في حاجة مهم اشتي انبهك عليها لا تودف ، تعرف معزتك عندي ..

القات يحلو .. قلت في نفسي أكيد لأن معاك اخ يحبك وينصحك ، وبسرعة قلت له ايش يا صلاح قول لي .. وتحمست وقلت له : "ماحدش يحبنا بالعالم زيك اخي .. واكيد حريص على مصلحتي وينبهنا" .

قال : حلو .. صلي على رسول الله .. قلت صلوات ربي عليه .. قال : اسمع اذا شتعمر ابدأ اشتري ارض ربك بيسهلها من هنا او من هنا ..

طمنا والقات قد هو بتركيز ١٠٠ ٪؜ قلت له ايوه اكيد وقدنا متخيل الأرض ..

قال بعد ما تشتري الارض امسحه ببوكلين وعملت الميده واطرح الفرش حقك هذا وطلع العمدان من تحت الفرش وبعدها اسقف براحتك .. او معك حل ثاني طلع العمدان واستأجر هيلوكبتر تطلع بها الفرش الله يلعنه من شجي يعاونك 

عليك ما تستحق يا صلاح يمين اني ما قد ضحكت بحياتي مثل ما ضحكت هذاك اليوم ، على الدهدهة اللي دهدهنا وخلينا اعمر بتخزينة ، وعلى الخاتمة السوداء حق العمدان وطلاعة الفرش