مقال ل فتحي بن لزرق(معصوبة الجنوب)

شوفوا علشان تفهموا ان الوضع مخراطة في مخراطة في الجنوب وان من يدعون أنهم انفصاليون يكذبون على الناس في الجنوب ويبيعون لهم وهما.

تابعوا هذا المنشور إلى نهايته وستخرجون مقتنعين قناعة تامة وسترددون كلمة مخراطة في مخراطة.

تعالوا نبدأ:

الجنوب احتلته ميليشيا الحوثي في 2015 وتحرر بنفس العام وبعد 4 أشهر من الاحتلال الحوثي ويومها كان الجنوب ولافيه ولا مسئول شمالي بل ولا حتى شمالي يحرك ساكن ولا حتى مسئول واحد بالشرعية داخل عدن أو غيرها.

هل كانت الظروف مهيئة للانفصال؟  نعم ..  هل اعلن الانفصال يومها أو حد تجرأ .. طبعا ..لا

ليش ..

اهااا هنا نجي لنقطة مهمة ..

قيادات الصرفة قالوا مش وقته ونحن الان مع التحالف اللي كان يجدل شنط فلوس وسلاح وقالوا للناس نحن الان مع فخامة الرمز الرئيس عبدربه منصور هادي.

المهم الناس كانت تصيح نشتي انفصال انفصال وقيادات الصرفة تقول لهم مش وقته خلونا مع هادي وبنتخارج.

المشكلة هنا هادي لاقال انا انفصالي ولا قال بافصل لكم الجنوب وكان كل مايطلع يقول سنقيم اليمن الاتحادي ولكن لان الموضوع فيه شنط بيس سعودي كانت قيادات الصرفة تقول للناس عبدربه ولا حد غيره بيفصل الجنوب..!

خذ نفس عميق.. بعّد الجوال من يدك تلفت يمين يسار ..

شوف اللي قدامك..

تمام شفت 

نكمّل..

المهم مشت الامور وقعت صوالين مصفحة وشنط سعودي بنادل بنادل والشعب ينطحن طحين..

مرت سنين وهم عايشين في النعيم محلات في دبي وشقق وعماير في مصر وهات يابه هات..

اختلفوا مع هادي ، زبطهم كعب خارج السلطة ..

3 سنين ماقدروا يعملوا قسم شرطة واحد ..! من المجنون اللي بيسلمهم دولة بكرة يتهددون العالم .

العالم يلطم خدوده حينما اعطى جنوب السودان دولة ورغم المصالح الدولية في اقامة هذه الدولة لان الجنوبيين هناك بكروا من ثاني اشقف قال اندف.

3 سنين وعدن غارقة في الفشل تصدق ان العالم ذا بيعطيك دولة تهدد بها العالم..

خرجوا من السلطة قالوا للناس نشتي جنوب فين الجنوب فين الجنوب خيطوا الاعلام ولاقونا للساحات .

خرجوا للساحات قالوا جنوب جنوب وبانحكم ..

صدق بعض المساكين وهللوا ..

خرجوا بخطابات نحن باننفصل بس نحن مع عبدربه اللي هو رئيس دولة الاحتلال التي نريد الفكاك منها.

ظهروا على القنوات التلفزيونية وقالوا نحن مع الملك سلمان ونحن سيوفه يضرب بنا حيثما شاء ، خرجت السعودية بدورها وقالت نحن مع وحدة اليمن وعقدت مؤتمر لرعاية مخرجات مؤتمر الحوار.

يعني انت مع السعودية اللي هي مع وحدة اليمن اللي انت ضد وحدته اللي السعودية تدعمها اللي انت تقول انك ولابتخالف لها كلمة.

من الحمار اللي بيصدق هرجك هذا.

انت تجلس على طاولة وتقول :" نحن مع ماسيقرره التحالف .. طيب التحالف يقولك بالحرف الواضح  مافيش انفصال.. تقدر تقول لاللتحالف .


طبعا مستحيل بكرة بترجع تتدين حق القات ..

سنة كاملة وهم يقولون أنهم سيفصلون الجنوب ونهاية المطاف يظهر اكبرهم ليقول لك :" سنضع يدنا بيد الرئيس عبدربه منصور هادي ، عبدربه اللي هو رئيس الاحتلال كيف بتضع يدك بيد رئيس دولة تحتلك وتريد تنفصل منها فهمنا ياخي كذا زاد المي على العصيد..

خلونا نرجع شوية لما كانوا في المناصب ، راحوا وادوا القسم الجمهوري تحت راية علم دولة الاحتلال ووقعوا توجيهاتهم طول عامين تحت اسم الجمهورية اليمنية طيب وكيف تريد انفصال من دولة انت ارتضيت تمثلها سنين ولو انك بقيت بمنصبك كنت إلى اليوم ممثل للجمهورية اليمنية.

طيب مالكم من هذا ..

ظروفك انت كشخص تريد تنفصل اليوم افضل ولا بعد 2015 طبعا اكيد بعد 2015 لاشرعية ولاقوات شرعية ولاحكومة ومزاج الناس كان انفصالي مية مية طيب ليش رحت تجيب الشرعية وحميتها وقويتها وشاركتها نفس الفراش وبعدين لما انزبطت قلت تريد انفصال.

ليش مارفضت مناصب الشرعية من اول يوم ياحبوب...؟

ازيد ولا كفاية..

اعتقد كفاية..

لاتصدقوا كل هذا الخريط انفصال مافيش وهذا امر يعرفه الجميع من اول يوم ، هناك حل يمني ويجب ان ينتزع الجنوبيين حقوقهم كاملة.

غير كذا هناك ثورة اسمها "ثورة ثورة ياجنوب .. ثورة ثورة عبي الجيوب.

#فتحي_بن_لزرق

13-أغسطس-2018

مقالات الكاتب