دردشة مع رائد طه بعيد ميلاده

يوسف نصر  سامحنا وصلت متأخر 
وانت زي مانت دائما زبق وقبلي بكل شيء ، بمواعيدك بحب الناس ، بمهارتك في التمثيل ، بالكوميديا بكل شي.

المهم
كل سنة وأنت طيب .. أيش تشتي هديتك السنة دي ؟ في حزام بمحل ميلاد بيناسبك تعال نشله ، ولاتشتي معوز ؟ تعال أعشيك بصيرة ونروح ندكي بأي مكان .

رسلك عمرو جمال ( يرجى الاتصال بي ) زي كل مرة ؟؟ ههههه بخيل دا الليد جزعه ضحك.

المهم ، أيش أخبار منى وأحمد عيالك ؟ ولا حد يسأل عليهم ؟ عادي ياصاحبي ربك كبير مايناسش حد ، مش كدا كنت تقولي دائما ؟؟

كم كانت قيمة العملية تبعك ؟ 15 الف دولار ؟؟ طب ياريت حد فينا مرتاح زي ماكنت تتمنى ):

لاتسألناش عن عدن بلا وجع قلب أسألك بالله ، أبوك وأمك عندك المهم ، هم بخير ؟ هيا الحمدلله

زوجتك مريم !! أنسانة جدعة تربي العيال ربنا يصبرها .

الفرقة ؟؟ ماخلاص مافيش فرقة ياصاحبي

أخر أعمالي ؟؟ زي مانا أخبط بالكل ومافيش حد يحبنا ودا آخر همي زي ماتعرف ههههههه

تعال نشل تاكسي ونروح نتعشي بروست لخم في المضخة وتشكي لي واشكي لك ونقلب أم عيدميلادك هم وغم كالعادة ههههههه

كم حفلة معانا الموسم دا ؟ أكثر من عشر طيب أنا باشل 60% وانتو اتقاسموا بالباقي ! ليش ؟ دا حقي ههههههههه لا ياكريه انا مش زي القنوات والجهات اللي كانت تظلمك بس أنت كنت تتنازل كثير وتجي على نفسك وترضى ، ورضوها عليك وسابوك تموت لوحدك .

على أيش تسأل ؟ عن الوعود اللي الوزير الفلاني قال عليها ومكتب المسؤول العلاني دق صدره فيها ؟؟ لا ولا حد أهتم ، هم بس كانوا متأثرين بالموقف وبعد كدا نسوا ، لابيت اكتمل بناءه ولا درجة وظيفية تحسنت ولاهم يحزنون .. مش فاضيين شقاهم للمطبلين وأنت ماكنتاش واحد منهم .

المهم كل سنة وأنت طيب ، من سالم ومحمد وأسامة وسليم ؟ ماعرفهمش ؟ أصحابك كثير ياخي .. كنت صاحب الكل بس مافيش آحد منهم صاحبك بجد .

مافيش غيرنا اليوم ياصحابي ، ماله الشميز اللي فوقي ؟ ماعجبكش ومن متى يهمنا رأيك أو رأي أي حد ؟ أنت بس الي كنت تهتم بالناس وكلامهم .

ومع هذا كله خلينا أقولك شي ،
الناس تحبك يارائد تحبك كثير أتعملت لك جنازة أسطورية ماشافتهاش عدن من زمان وكل الفنانيين الكبار اللي كانوا يكرهوك بحياتك كرهوك أكثر يوم موتك وحسدوك حتى على جنازتك .. تشتي تعرف من ؟ خلاص خليها مرة ثانية وأنا باقولك تعرفنا وجهي وطي** سوا  .. دونا استكثروا تسمية مسرح حافون باسمك ، تصدق !

المهم كل سنة وأنت طيب وتعال نكمل بالخاص عشان أحكي لك أخر التخبيصات ، المهم أنت تمام ؟ لا مش تمام ؟؟ طيب تعال خاص خلينا نفضفض ، أجيت لك هنا بس عشان اروي الناس اني اتذكرتك بعيدميلادك وكدا ، تعال خاص تعال .
كل سنة وانت طيب ياأحلى الأصحاب