#معاكم_سلاح!!

اليوم ونحن رايحين الشغل انا والزميل علي الحنشي قلت له :" مارايك اليوم نجزع طريق التقنية بدل ماكل يوم نمر بنفس الطريق ..

قال :" على طول توكل 

المهم داعسين بالسيارة ومشغلين اغنية على المزاج .. قليل الا ودخلنا التقنية وان قدامنا نقطة للحزام الامني ..

جندي طول بعرض واقف بالنقطة والبندق فوق كتفه وعادنا بعيد الا وقده يأشر بيده ..

التفت ناحية علي وقلت له :" اليوم يوم زب الحمار ..

قال :"اصبح لاصبحك ..

المهم وقفنا من النقطة  نزلنا الزجاج حق الباب الامامي ، دخل الجندي رأسه مد يده يعسعس حول خصري..

قلت له :" مالك صل عالنبي ايش تدور ..!؟

قال :" ايش ندور؟ .. ايش شفت ندور؟، جندي طول بعرض ايش بيكون يدور .. سلاح ياحاذق ...!

هزيت رأسي قلت في قلبي :" والله يوم زب الحمار من بدايته..

والجندي يدور عن السلاح، الا وهيلوكس خلفي يدق هون بقوة ، انزل راسي قليل اشوف بالمراية الا والهيلوكس محشحش مسلحين شعورهم مركزة وواحد متحمل اربيجي تقول زب حمار  راكزها.

التفت ناحية علي وقلت له :"اليوم شكله مش معدي ..

فنننننن فننننننننننن 

قليل الا والهيلوكس ويفحط يرجع وراء ويقطع الطريق الثاني ويفحط ويجي فوقنا التراب ..

الجندي وهو يهش الغبار:" ... عارهم بلا ادب ولا يحترموا احد..

انا - ... عارهم فعلا وعادهم مسلحين ..!

الجندي : ايش تقصد ؟

انا - لا والله ولا شي ... عار عراعيرهم ..

الجندي - احسب...

انا - طيب نمشي ..!

الجندي : نزل الزجاج خلينا نتأكد في سلاح ولا مافيش ..

انا :" ياخي والله مافيش اي سلاح كان معي مسدس تاتا وسرقوه الخبرة الجدد.

الجندي :" صبرك ياخي صبرك دقايق صبرك يامواطن صبرك تشتوا دولة ومش قادرين تصبروا دقيقة ..

الجندي يقلب السيارة والكراسي الا ومسلحين ثانيين فوق طقم جايين من ناحية خط التسعين مفحطين ولابسين مدني .

قييييييييييييييييط وقفوا عندنا ..

الجندي يخرج رأسه ..

المسلحين :" فين طريق بير احمد؟

الجندي :" شفت تمشي ساني وتلف تلاقي فكيتين ارجع يمين..

المسلحين :" شكرا شكرا ..

على بعد 100 متر من النقطة ، كانوا ستة اشخاص يتصايحون وهم يحملون مدفع صغير فوق دينا ..

قلت للجندي:" شف شف بالله .. ايش الفوضى هذه يحمًلون مدفع وسط الشارع..

الجندي :" ايوه والله ..

انا :" انًيًك لعارهم ولا مافيش داعي..

الجندي :" لالا خلاص يكفي نيًكت اللي قبل كفيت ووفيت .

انا :" عادي والله كله لاجل الوطن ..!طيب عادي اطرقهم لهم صورة ..!

الجندي :" لالا باتعمل لنا مشكلة..

انا :" طيب مايقعش لا صورة ولا غيره

الجندي يرجع ناحيتي ويضع يده على كتفي ويربت قائلا :" خلاص تقدر تمشي الان ، شفنا عرفتك انت فتحي بن لزرق وانتبه تروح تكتب منشور ان مافيش امن ولا حاجة وان مافيش تفتيش زي الناس  ..

انا :" لاو الله ياخي ، انا قدنا كل يوم اجزع كالتكس مش عارف ايش قال لامي اجزع هنا اليوم ..

الجندي :" لالا مافيش حاجة بس علشان اذا كتبت منشور تقول الحقيقة وكيف التفتيش..

انا :" الشهادة لله تفتيش دقيق رغم انك بهذلتنا بس طالما لاجل امن الناس بنتحمل وبكتب منشور يشيد بكم ..

الجندي :" الله يحفظك ، والله ياخي للصالح العام 

يحك رأسه :" اخي بتكتب منشور ؟ 

انا :" ايوه والله بكتب منشور عن هذا التفتيش الدقيق الله يحفظكم..

الجندي :" الله يحفظك اخي ..بنتظر المنشور شوف دائما اشوف صفحتك..

انا :" ولا يهمك اخي الساعة 8 المساء بتلاقيه بالصفحة ..

الجندي :" شكرا شكرا ..

انا :" عفوا عفوا ..

فتحي بن لزرق 

30 مارس 2019

مقالات الكاتب