أرضية الفندم!

قرأت أمس تعليق في منشور للزميل فتحي بن لزرق لواحد من المسؤولين سابقا يلمح فيه الى مظلومية عدد من الشماليين في عدن على خلفية الحرب الأخيرة واحداث العام 2011.

المسؤول اياه -الموثق حسابه بالعلامة الزرقاء- في اعتقادي انه يلمح الى ممتلكات خاصة به .. او للفندم اللي وفر له الدفع الرباعي صوب كرسي المسؤولية!

اتفق مع مظلوميات الناس البسطاء .. واصحاب الوحدات السكنية اللي تم شراءها بالتقسيط .. وووالخ .. لكن شلوها مني (فتوة) اي وحدات سكنية منهوبة بعد حرب 94 حلال زلال عليكم! و....... ما شرجع شي!

اتذكر بداية الألفية اتصل بي اخي الكبير الدكتور  أكرم الزمر وقال لي تنزل معي عدن أنا وصاحبي .. قلت له يالله .. كنت متعلق بعدن حد الجنون!

جاء صاحبه عسكري .. وبسيارة حبة وربع .. توكلنا طريق طريق .. وعلى طريقة اصحاب الفضول .. قلت له ايش معك بعدن يا فلاااان؟ قال با نروح نتفقد الاراضي حق الفندم!

سكت سكتة .. وقلت مساكين .. شكله معاهم مشكلة بالارضية سع حق الوالد اللي في منطقة (الحصب) بتعز وجالسين نشارع عليها من الحرب العالمية الثانية ولا وصلنا لطريق! وصنجت لهم دعوة (يارب وفقهم).

وصلنا عدن .. واقسم بمن رفع سبع .. وبسط سبع .. الرجال يلف يلف يلف بالسيارة قريب الطريق البحري .. وعلى مسافة قريبة من مدرج الطائرات الخاص بمطار عدن!

قلت شكله ضيع الارضية.. حرام .. الله يسهل لهم .. طبعا انا لازلت حينها صغير العمر .. ومش حق اراضي .. ولصوصية ووالخ ! ما راح حسي انه جالس يلف حول اراضي الفندم الا وقت سألته اين الارضية؟

رد قال احنا نلف حولها من أول (دوران) .. لما دارت الأرض فوق راسي.. واقسم بالله ان المسافة مهولة وما اعرف اقدرها لكن تصلح لمدينة سكنية على الأقل ولاحقا تأكدت انها فود حرب 94.